.LK ඩොමේන් නාම 35 වසරක් පුරා ලියාපදිංචි කිරීම හා ශ්‍රී ලංකාවේ ඩිජිටල් සුරක්ෂිතතාව සුරකින TechCERT ආයතනය එහි 20 වන වසරක සුවිශේෂී සැමරුම් අතරේ මේ වසරේ තවත් සන්ධිස්ථානයක් සනිටුහන් කරමින්, FOUNDATION.LK එළි දක්වයි.
ලාභය සඳහා නොවන ආයතනයක් වන FOUNDATION.LK ශ්‍රී ලාංකිකයින්ට සයිබර් අවකාශය ආරක්ෂිතව සහ විශ්වාසයෙන් යුතුව භාවිතා කිරීමට අවශ්‍ය දැනුම, කුසලතා සහ සම්පත් ලබාදිම, ඩිජිටල් තාක්ෂණය වගකිම් සහගත ලෙස භාවිතා කිරීම ප්‍රවර්ධනය කිරීම, හා දිනෙන් දින අලුත් වන ඩිජිටල් පරිසරයේ පුරවැසියන් සඳහා නව අවස්ථා විවර කිරීමට දායකත්වය සැපයීම වැනි ප්‍රධාන අරමුණු කිහිපයකින් සමන්විතයි .
2009 වසරේ සිට මේ දක්වා LK Domain Registry ආයතනය මගින්, දිවයින පුරාම සිය සමාජ සවිබල ගැන්වීමේ වැඩසටහන් හරහා සිසුන්, ගුරුවරුන් සහ විදුහල්පතිවරුන් 45,000කට අධික සංඛ්‍යාවකට, තොරතුරු හා සන්නිවේදන තාක්ෂණ (ICT) දැනුම සහ කුසලතාවන් මගින් සවිබල ගන්වමින් සහය දක්වා ඇත. එමගින් දියත් කළ, ඉගෙනුම් පද්ධතිය වන “සුහුරුසර” මගින්, Web Design, Programming හා Multimedia පාඨමාලා හරහා 10,000 කට අධික සිසු පිරිසක් සවිබල ගන්වා තිබේ. සිසුන්ට මෙම පාඨමාලා සිංහල හා දෙමළ භාෂාවෙන් ඉදිරිපත් කරන බැවින් පහසුවෙන් අවබෝධ කරගැනීමට හැකි වීම නිසා අධ්‍යයන හා වෘත්තීය අවස්ථා පුළුල් කර ගැනීමට හැකිවේ. සයිබර් අවකාශයේ ඔබේ මිතුරිය වන ‘හිතවතී’, හරහා මිලියන 1.25 කට අධික අන්තර්ජාල පරිශීලකයින් පිරිසකට ඩිජිටල් ලෝකය විශ්වාසයෙන් මෙන්ම, වගකීමෙන් යුතුව පරිහරණය කිරීමට අත්‍යවශ්‍ය දැනුමෙන් සන්නද්ධ කර තිබේ. ඒ අතර හිතවතී මගින් සයිබර් ගැටලුවලට මුහුණ දී ඇති 10,500කට අධික පිරිසක් සෘජු සහය ලබාගෙන ඇත. තවද , අධ්‍යාපන කලාප 67ක් පුරා ඇති පාසල් 1,649 ක වෙබ් අඩවි නිර්මාණය කිරීමට සිසුන් සවිබල ගන්වමින් “සයිබර් ලොවට පියාපත් ” වැඩසටහන ද දියත් කෙරිණි. එය, දිවයිනේ 18,000කට අධික සිසු පිරිසක් සහ 2,100කට අධික ගුරුවරුන් පිරිසකට, ඩිජිටල් යුගයේ සාර්ථකත්වය ළඟාකර ගැනීමට අවශ්‍ය, මූලික ඩිජිටල් කුසලතාවලින් පොහොසත් කරමින් සාර්ථකව පවත්වන ලද වැඩසටහනකි. මෙම වසරේ සංවත්සර සැමරුමට සමගාමීව ඉදිරියේ දී, මේ වැඩසටහන් සියල්ලම, FOUNDATION.LK හරහා අඛණ්ඩව පවත්වාගෙන යනු ලැබේ.
මෙරට ඈත ගම්බද ප්‍රදේශවල ඩිජිටල් කුසලතා පුහුණුවීම සඳහා පවතින සීමිත ප්‍රවේශය, දැනුම පරතරය වැඩි කරන කාරණයක් වන බැවින්, තාක්ෂණය මත පදනම් වූ වර්තමාන ආර්ථිකය තුළ අවස්ථාවන් සීමිත, අඩු පහසුකම් සහිත එවන් ජනතාවගේ ඩිජිටල් තාක්ෂණ කුසලතා නැංවීමට FOUNDATION.LK කැප වෙයි. “සුහුරුසර” වෙබ් අඩවිය හරහා ඩිජිටල් දැනුම ලබාදී ගම්බද ඩිජිටල් දැනුම් පරතරය පියවන අතරෙහි, තාක්ෂණික ලෝකයේ අවස්ථාවන් උදාකිරීම සඳහා එම වෙබ් අඩවිය මගින් පාඨමාලා පැවැත්වීම සිංහල හා දෙමළ භාෂාවලින් සිදුකරයි. සයිබර් ආරක්ෂණය පිළිබඳ පුරවැසියන් දැනුවත් කරන “හිතවතී” අත්‍යවශ්‍ය ඩිජිටල් ආරක්ෂණ දැනුමෙන් ඔවුන්ව සන්නද්ධ කරන වැඩසටහනකි. එමගින්, අන්තර්ජාලය විශ්වාසයෙන් හා වගකීමෙන් යුතුව පරිහරණය කිරීමට පුරවැසියන් සවිබල ගන්වයි. එමෙන්ම, FOUNDATION.LK මගින් හඳුනාගත් ඩිජිටල් තාක්ෂණික මධ්‍යස්ථාන ජාලයක් හරහා, , ග්‍රාමීය හා අර්ධ නාගරික ප්‍රදේශවල, තොරතුරු හා සන්නිවේදන තාක්ෂණ (ICT) සහතිකපත්‍ර පාඨමාලා, ධාරිතා-ගොඩනැගීමේ වැඩසටහන් මෙන්ම ඩිජිටල් තාක්ෂණය පිළිබඳ දැනුවත් කිරීමේ වැඩසටහන් පවත්වනු ලබයි. ඒ ඔස්සේ එම ප්‍රදේශවල ඩිජිටල් පරතරය තුරන් කිරීමට පියවර ගන්නා අතරෙහි. දේශීය හා විදේශීය වෘත්තීය අවස්ථාවන්ට අවශ්‍ය කුසලතා, වෘත්තීය ප්‍රවේශය මෙන්ම, අත්‍යවශ්‍ය සුදුසුකම්වලින් තරුණ පිරිස සවිබල ගන්වයි.
මේ පිළිබඳව සිය අදහස් පළ කරමින්, LK Domain Registry ආයතනයෙහි ප්‍රධාන විධායක නිලධාරී, හා ඩොමේන් රෙජිස්ට්‍රාර්, මහාචාර්ය ගිහාන් ඩයස් මහතා පැවසුවේ මෙසේයි. “Top level .lk” ඩොමේන් නාමය සම්බන්ධ පරිපාලකයා ලෙස, LK Domain Registry, ලාභය සඳහා නොවන ආයතනයක් ලෙසින් සැමවිටම ප්‍රජාව සවිබල ගැන්වීමේ කාර්යය සඳහා කැපවී සිටියා. අපගේ මුල් අරමුණ වුණේ අන්තර්ජාල භාවිතය පුළුල් කිරීමයි. පසුව එය ශ්‍රී ලංකාව පුරාම ජනතාවට ඩිජිටල් අවකාශයේ සම්පූර්ණ හැකියාවන් තුළින් උපරිම ආකාරයෙන් ප්‍රයෝජනයට ගැනීමට සහය වීම දක්වා එම අරමුණ තවදුරටත් පුළුල් වුණා. එම පුළුල් මෙහෙවර තවදුරටත් ඉදිරියට ගෙන යාම සඳහායි, අපි FOUNDATION.LK දියත් කළේ. ඒ හරහා ඩිජිටල් දැනුම් පරතරය පියවන අතරෙහි කුසලතා නංවමින්, සියලු දෙනාට වැඩි වශයෙන් ප්‍රවේශ විය හැකි ඩිජිටල් පරිසරයක්ගොඩනැගීමට අප කටයුතු කරනවා.”
TechCERT හි ප්‍රධාන විධායක නිලධාරී කුෂාන් ෂර්මා මහතා සඳහන් කළේ, “වසර 20කට පෙර ශ්‍රී ලංකාවේ ප්‍රථම පරිගණක හදිසි ප්‍රතිචාර කණ්ඩායම ලෙස ස්ථාපිත කළ TechCERT, අද වන විට රටේ ප්‍රමුඛතම තොරතුරු තාක්ෂණ ආරක්ෂණ සහ ඉංජිනේරු උපදේශන සේවා ආයතනයක් ලෙස සාර්ථක පරිණාමයක් අත් කරගෙන ඇති” බවයි.
දිවයින පුරාම ජනතාව ඩිජිටල්කරණයෙන් සවිබල ගැන්වීමේ සිය මෙහෙවරෙහි නියැළෙන FOUNDATION.LK හා අත්වැල් බැඳගනිමින් එක්වන ලෙසට මෙරට සංවිධාන, ආයතන සහ පුද්ගලයින්ට ආරාධනා කරයි. එහි වැඩසටහන් සඳහා සහයෝගය හා අනුග්‍රහය දැක්වීමෙන්, දැනුවත් කිරීමේ වැඩසටහන් පැවැත්වීමෙන් පමණක් නොව, මුල්‍ය පරිත්‍යාග මගින්ද දායක විය හැක. වැඩි විස්තර සඳහා www.foundation.lk වෙත පිවිසෙන්න.