පීපල්ස් ලීසිං ඇන්ඩ් ෆිනෑන්ස් පීඑල්සී සමාගම ශ්‍රී ලංකාවේ බැංකු නොවන මූල්‍ය ආයතන (භඊත්‍ෂ) ක්ෂේත්‍රයේ ප්‍රථමවරට දරුවන් සඳහා “සෙනෙහස්” නමින් ළමා ස්ථාවර තැන්පතු ක්‍රමයක් හඳුන්වා දී ඇත.
මෙම සෙනෙහස් ළමා ස්ථාවර තැන්පතු ක්‍රමය මූල්‍ය ක්ෂේත්‍රයට නිල වශයෙන් හඳුන්වාදීමේ උත්සවය පීපල්ස් ලීසිං සමාගමේ ගරු සභාපති ප්‍රදීප් අමිර්තනායගම් මහතා සහ එම ආයතනයේ ප්‍රධාන විධායක නිලධාරී/ සාමාන්‍යාධිකාරී ගරු ෂමින්ද්‍ර මර්සිලීන් මහතාගේ ප්‍රධානත්වයෙන් පීපල්ස් ලීසිං ප්‍රධාන කාර්යාල පරිශ්‍රයේදී පසුගියදා පැවැත්වුණු අතර එම අවස්ථාවට පීපල්ස් ලීසිං සමාගමේ ජ්‍යෙෂ්ඨ කළමනාකාරීත්වයද සහභාගී විය. මෙම සුවිශේෂී අවස්ථාව වර්ණවත්කිරීම සඳහා විවිධ වයස් කාණ්ඩවලට අයත් දූ දරුවන් සමූහයක් ඔවුන්ගේ දෙමාපියන් සමග සහභාගී වූ අතර ‘සෙනෙහස්’ ළමා ස්ථාවර තැන්පතු සහතිකපත් පිරිනැමීම එහිදී සිදුකෙරුණි. තවද, මෙම අවස්ථාවට කොළඹ අධ්‍යාපන කලාපයට අයත් ජාතික පාසල්වල විදුහල්පතිවරුද සහභාගී වූහ.
‘සෙනෙහස්’ ළමා ස්ථාවර තැන්පතු ක්‍රමය මූල්‍ය ක්ෂේත්‍රයට හඳුන්වා දෙනු ලැබුවේ දැයේ දරුවන් අතර ඉතුරුම් ප්‍රචලිතකිරීම හා ඉතිරිකිරීමේ පුරුද්ද ඔප් නැංවීමේ අරමුණෙනි. බැංකු නොවන මූල්‍ය ආයතනයක් ලෙස පීපල්ස් ලීසිං සමාගම තිරසාරත්වය ඇතිකිරීමේ අරමුණින් කුඩා අවධියේ සිටම ඉතිරිකිරීම පුරුදු පුහුණුකිරීමේ වැදගත්කම අවධාරණය කරමින් තිරසර සමාජයක් ගොඩනැගීම සඳහා විශාල දායකත්වයක් සපයන කැපවීමෙන් කටයුතු කරන ආයතනයකි.
වසර ගණනාවක් පුරාවට විශ්වාසයේ ප්‍රමුඛයා ලෙස සිය සන්නාමය එක ලෙස නොවෙනස්ව රඳවා තබා ගත් පීපල්ස් ලීසිං සමාගමේ ප්‍රමුඛතාවය වන්නේද සමාගමේ සියළුම ගණුදෙනුකාරභවතුන් හට එහි සාර්ථකත්වයේ ප්‍රතිලාභ උපරිම වශයෙන් භුක්ති විඳීමට අවස්ථාව සැලසීම සහතික කිරීමය.
පීපල්ස් ලීසිං සමාගම යනු ශ්‍රී ලංකාවේ ප්‍රමුඛ පෙළේ බැංකු නොවන මුදල් ආයතනයක් වන අතර ප්‍රමුඛ රාජ්‍ය බැංකුවක් වන මහජන බැංකුවට අනුබද්ධිත මුදල් ආයතනයකි. විශේෂිත ලීසිං සමාගමක් ලෙස වර්ෂ 1996 දී සිය මෙහෙයුම් කටයුතු ආරම්භ කළ පීපල්ස් ලීසිං සමාගම 2011 වසරේ කොළඹ කොටස් වෙළඳපලේ ලැයිස්තුගත විය. පීපල්ස් ලීසිං සමාගම බංග්ලාදේශයේ විදේශීය ව්‍යාපාරයක් ඇතුළු අනුබද්ධිත ක්ෂේත්‍ර හයක් හරහා විවිධාංගීකරණය වූ බැංකු නොවන මූල්‍ය බලවතෙක් දක්වා වර්ධනය වී ඇත.
ඡායාරූප විස්තරය -1- පීපල්ස් ලීසිං සමාගමේ සභාපති ප්‍රදීප් අමිර්තනායගම් මහතා (වම් පස සිට තෙවන) විසින් ස්ථාවර තැන්පතු සහතිකය ප්‍රථම තැන්පත්කරුට නිල වශයෙන් පිළිගැන්වූ අවස්ථාව. එම අවස්ථාවට සහභාගීවූ ප්‍රධාන විධායක නිලධාරී/සාමාන්‍යාධිකාරී ෂමින්ද්‍ර මර්සිලීන් මහතා (වම් පස සිට දෙවන) ඇතුළු ජ්‍යෙෂ්ඨ කළමණාකාරීත්වය.
ඡායාරූප විස්තරය-2- පීපල්ස් ලීසිං සමාගමේ ප්‍රධාන විධායක නිලධාරී/ සාමාන්‍යාධිකාරී ෂමින්ද්‍ර මර්සිලීන් මහතා (වම් පස සිට පළමුවන) ඇතුළු ජ්‍යෙෂ්ඨ කළමණාකාරීත්වය එම අවස්ථාව සඳහා සහභාගී වූ දූ දරුවන් සමඟ පෙනී සිටි සමූහ ඡායාරූපය.