ශ්‍රී ලංකාවේ විවිධාංගීකරණය වූ සමාගම් සමූහයක් වන සන්ෂයින් හෝල්ඩින්ග්ස් ශක්තිමත් ස්ථාවර මූල්‍ය කාර්යසාධනයක් අඛණ්ඩව පවත්වා ගනිමින් 2024 සැප්තැම්බර් 30 වනදායින් අවසන් වන මාස හය සඳහා (1HFY25) රුපියල් බිලියන 30.1 ක ඒකාබද්ධ ආදායමක් වාර්තා කර ඇති අතර එය පසුගිය වසරේ එම කාල පරිච්ඡේදයට සාපේක්ෂව 6.8% ක වර්ධනයකි.
දළ ලාභ ආන්තිකය 30.4% ක ස්ථාවර මට්ටමක පැවතීමත් සමඟ පළමු මාස හය සඳහා දළ ලාභය පසුගිය වසරේ එම කාල පරිච්ඡේදයට සාපේක්ෂව 6.2% කින් ඉහළ ගොස් රුපියල් බිලියන 9.1ක් වී ඇත. පාරිභෝගික සන්නාම සහ කෘෂි ව්‍යාපාර අංශවල ලාභයේ වෙනස අඩු වුවද සුව සේවා අංශය එහි ලාභයේ වෙනස ඉහළ නංවා ගැනීමට සමත් වූ අතර එය සමූහයේ සමස්ත ලාභය ඉහළ නැංවීමට ධනාත්මක ලෙස උපකාරී විය. ප්‍රධාන වශයෙන් කෘෂි ව්‍යාපාර අංශයේ බදු වැඩිවීම හේතුවෙන් සමූහයේ අදාල කාලපරිච්ඡේදය සඳහා බදු පසු ලාභය (PAT) රුපියල් බිලියන 2.9 ක් වූ අතර එය පසුගිය වසරේ අදාල කාල පරිච්ඡේදයට සාපේක්ෂව 19.6% ක අඩුවීමකි.
සන්ෂයින් සමූහය ලබා ගත් මෙම ඉහළ වර්ධනයට සුව සේවා අංශය විශාල දායකත්වයක් ලබා දුන් අතර එය මුළු ආදායමෙන් 53.7% කි. මේ අතර පාරිභෝගික අංශය 32.2% ක් ද කෘෂි ව්‍යාපාර අංශ 14.2% ක් ද වශයෙන් සමූහයේ මුළු ආදායමට දායක විය.
ඔක්තෝම්බර් මාසයේදී ජාත්‍යන්තර මූල්‍ය සංස්ථාව (IFC) විසින් සන්ෂයින් සමූහයේ සුව සේවා අංශය වන Sunshine Healthcare Lanka (SHL) වෙත සාර්ථක කොටස් ආයෝජනයක් සිදු කළේය. සමාගම විසින් දැනටමත් මෙම අරමුදල් දේශීය ඖෂධ නිෂ්පාදනය පුළුල් කිරීම, උසස් තාක්ෂණයෙන් යුතු වෛද්‍ය උපකරණ සඳහා ආයෝජනය කිරීමෙන් එහි රෝග විනිශ්චය සේවා වැඩිදියුණු කිරීම මෙන්ම සමාගමේ බෙදාහැරීමේ ජාලය සහ පාරිභෝගික වෙළඳාම ශක්තිමත් කිරීම ඇතුළුව SHL හි මෙහෙයුම් සැලකිය යුතු ලෙස ඉහළ නැංවීම සඳහා භාවිත කිරීම ආරම්භ කර ඇත.
සමූහය ලබා ගත් මෙම මූල්‍ය ප්‍රතිඵල පිළිබඳව අදහස් දක්වමින් සන්ෂයින් සමූහයේ ප්‍රධාන විධායක නිළධාරී ශ්‍යාම් සතාසිවම් මහතා පැවසුවේ “මෙම කාල සීමාව තුළ සමාගමේ මූල්‍ය ප්‍රතිඵල මගින් වෙනස්වන තත්වයන්ට ඉක්මනින් අනුවර්තනය වීමට අපට ඇති හැකියාව පෙන්නුම් කරන අතර අපගේ දැක්ම කෙරෙහි අවධානය යොමු කරමින් දුෂ්කර ආර්ථික තත්වයන් මධ්‍යයේ වුවද ස්ථාවර වර්ධනයක් අත්කර ගැනීමට අපට ඉඩ සලසනවා. සමාගමේ ඔරොත්තු දීමේ හැකියාව මගින් පාර්ශවකරුවන් සඳහා වටිනාකමක් නිර්මාණය කිරීම කෙරෙහි අවධානය යොමු කිරීම සහ ජාතිය ගොඩනැගීමට දායක වීමේ අපගේ කැපවීම හොඳින් පෙන්නුම් කරනවා. ඖෂධ නිෂ්පාදනය සහ රෝග විනිශ්චය සේවා වැඩිදියුණු කිරීම සඳහා වන ජාත්‍යන්තර මූල්‍ය සංස්ථාවේ ආයෝජනය සමඟින් දේශීය සැපයුම් දාමයන් ශක්තිමත් කරමින් ශ්‍රී ලංකාවේ ක්‍රමයෙන් වර්ධනය වන අවශ්‍යතා සපුරාලීම සඳහා සන්ෂයින් හෝල්ඩින්ග්ස් හොඳින් සූදානම්ව සිටිනවා.” යනුවෙනි.
සුව සේවා අංශය
සමූහයේ සුව සේවා අංශය FY25 මූල්‍ය වර්ෂයේ පළමු අර්ධය තුළදී රුපියල් බිලියන 16.1 ක පිරිවැටුමක් උපයා ඇති අතර එය පසුගිය වසරේ අදාල කාල පරිච්ඡේදයට සාපේක්ෂව 16.6% ක වර්ධනයකි. ඖෂධ බෙදාහැරීමේ ව්‍යාපාරයේ සහ ඖෂධ නිෂ්පාදන ව්‍යාපාරවල ශක්තිමත් කාර්යසාධනය මෙම වර්ධනයට හේතු විය. මේ අතර ඖෂධ නිෂ්පාදන පහසුකම් වඩාත් කාර්යක්ෂව භාවිත කරන ලද අතර එමගින් නිෂ්පාදනය වැඩි වීම සහ ඖෂධ බෙදාහැරීමේ ව්‍යාපාරය විසින් බෙදා හරින ලද ඖෂධ නිෂ්පාදන අලෙවිය ඉහළ යාම හේතුවෙන් සුව සේවා අංශයේ පොලී සහ බදු පෙර ඉපැයීමේ (EBIT) වෙනස වැඩි වී ඇත.
සමූහයේ ඖෂධ නිෂ්පාදන ව්‍යාපාරය වන ලීනා මැනුෆැක්චරින් පුද්ගලික සමාගම පසුගිය වසරට සාපේක්ෂව 110.9% ක කැපී පෙනෙන ආදායම් වර්ධනයක් ලබා ගෙන ඇති අතර Metered-Dose ඉන්හේලර් (MDI) කර්මාන්තශාලාවේ නිෂ්පාදනයන් ඉහළ යාම මෙයට හේතු විය. අද වන විට ලීනා රජයේ 2024 වසරේ MDI අවශ්‍යතාවයෙන් බහුතරයක් සපුරා ඇත.
පාරිභෝගික අංශය
පසුගිය වසරට සාපේක්ෂව අපනයන සහ දේශීය ව්‍යාපාර ඇතුලත් පාරිභෝගික අංශයේ ආදායම 0.3% සුළු පහළ යාමක් පෙන්නුම් කරමින් FY25 පළමු අර්ධයේදී රුපියල් බිලියන 9.7 ක් වාර්තා කර ඇත. කෙසේවෙතත් FY25 දෙවන කාර්තුවේ ආදායම පසුගිය කාර්තුවට සාපේක්ෂව 1.2%කින් වර්ධනය වී ඇත. පාරිභෝගික මිලදී ගැනීම් අඩුවීම හේතුවෙන් සන්නාමගත තේ සහ රසකැවිලි අංශය ඇතුලත් දේශීය ව්‍යාපාරවල විකුණුම් පහත වැටුණු නමුත් පළමු අර්ධය තුළ අපනයන ආදායම පසුගිය වසරේ අදාල කාල පරිච්ඡේදය හා සැසඳීමේදී 26.8% කින් වර්ධනය විය.
කෘෂි ව්‍යාපාර අංශය
සමූහයේ කෘෂි ව්‍යාපාර අංශය නියෝජනය කරන වටවල වැවිලි සමාගම සහ Watawala Dairy Limited රුපියල් බිලියන 4.3 ක ආදායමක් වාර්තා කර ඇති අතර එය පසුගිය වසරේ අදාල කාල පරිච්ඡේදයට සාපෙක්ෂව 7.4%ක පහත වැටීමකි. මෙයට මූලික වශයෙන් හේතු වූයේ පාම් ඔයිල් ව්‍යාපාරය 6.9%කින් පහත වැටීමයි. කිරි ආශ්‍රිත නිෂ්පාදන පහත වැටීම හේතුවෙන් පසුගිය වසරේ එම කාල පරිච්ඡේදයට සාපේක්ෂව කිරි ආශ්‍රිත නිෂ්පාදන ව්‍යාපාරය FY25 පළමු අර්ධයේදී රු. මිලියන 617ක ආදායමක් වාර්තා කර ඇත. කෘෂි අංශයේ බදු පසු ලාභය (PAT) FY25 පළමු අර්ධයේදී රුපියල් මිලියන 984 ක් බවට පත් වී ඇත. එය පසුගිය වසරේ එම කාලය හා සැසඳීමේදී 39.6%ක පහත වැටීමක් වන අතර ඉහළ බදු, මෙම පහත වැටීමට හේතු විය.