DFCC බැංකුව International Institute of Health Sciences (IIHS) සමග එක් වී හෙද සේවා සහ සාත්තු සේවා පාඨමාලා/ උපාධි හදාරන ශිෂ්‍ය ශිෂ්‍යාවන් වෙනුවෙන් විශේෂ අධ්‍යාපන ණය යෝජනා ක්‍රමයක් හඳුන්වා දී තිබේ. IIHS යනු ලන්ඩනයේ Coventry University හා සම්බන්ධ අධ්‍යාපන ආයතනයක් වන අතර, එය විශේෂයෙන්ම සාත්තු සේවා පාඨමාලා ඇතුළුව මෙරට සෞඛ්‍ය ක්ෂේත්‍රයේ පාඨමාලා සම්බන්ධ ප්රමුඛතම ආයතනයක් ලෙස සැලකේ. මෙම විශේෂ ණය ක්‍රමය යටතේ සිසුන්ට තම අධ්‍යාපන ණය පහසුකම් සඳහා විශේෂ පොලී අනුපාත සමග ප්‍රතිලාභ රැසක් හිමිවනු ඇත.
මෙම ප්‍රතිලාභ අතරට ණය පහසුකම යටතේ පාඨමාලාවට අදාළ මුළු මුදලම ලබාගත හැකි වීම, වසර 7 ක් දක්වා ආපසු ගෙවීමේ කාලයක් හිමි වීම සහ ගනුදෙනුකරු වෙතටම පැමිණ සේවාවන් සැපයීම ඇතුළු ප්‍රතිලාභ රාශියක් ඇතුළත් වී තිබේ. IIHS ආයතනයේ පාඨමාලා සඳහා නව බඳවාගැනීම් සිදුකිරීමට නියමිත අවස්ථාවක මෙම අධ්‍යාපන ණය ක්‍රමය හඳුන්වා දී තිබීම සිසුන්ට ඉමහත් සහනයක් වනු නිසැක ය. මේ යටතේ සිසුන්ට ඉතාමත් පහසුවෙන් ජාත්‍යන්තර පිළිගැනීමක් සහිත හෙද සේවා ගෞරව උපාධි පාඨමාලාවක් [BSc (Hons)] ශ්රී ලංකාවේදීම හැදෑරීමට අවස්ථාව ලැබේ.
DFCC බැංකුව වෙනුවෙන් එහි ජ්‍යෙෂ්ඨ උප සභාපති (ජාත්‍යන්තර බැංකු සේවා, ප්‍රේෂණ සහ ව්‍යාපාර සංවර්ධන) ඇන්ටන් ආරුමුගම් මහතා සහ IIHS වෙනුවෙන් එහි ප්‍රධාන විධායක නිලධාරී/සම-නිර්මාතෘ වෛද්‍ය කිත්සිරි එදිරිසිංහ මහතා ගිවිසුමට අත්සන් තැබූහ.
මේ සම්බන්ධයෙන් DFCC බැංකුවේ ජ්‍යෙෂ්ඨ උප සභාපති (ජාත්‍යන්තර බැංකු සේවා, විදේශ මුදල් ප්‍රේෂණ සහ ව්‍යාපාර සංවර්ධන) ඇන්ටන් ආරුමුගම් මහතා මෙසේ අදහස් දැක්වී ය. “ශ්රී ලංකාවේ සෞඛ්‍ය අධ්‍යාපනයේ දැවැන්තයෙකු වන IIHS සමග මෙලෙස අත්වැල් බැඳගැනීමට හැකි වීම අපට මහත් සතුටක්. තරුණ පරපුරේ බොහෝ දෙනෙකු මේ වනවිට සෞඛ්‍ය ක්ෂේත්‍රය තුළ ස්ථාවර වෘත්තීය ජීවිතයක් ගොඩනංවා ගැනීමට බලාපොරොත්තුවෙන් සිටිනවා. ඔවුන් වෙනුවෙන් මෙබඳු ආකර්ෂණීය ණය යෝජනා ක්‍රමයක් හඳුන්වා දීමට හැකි වීම අපට මහත් සතුටක්. ජාත්‍යන්තර වශයෙන් පිළිගත් සෞඛ්‍ය උපාධියක් ශ්රී ලංකාවේදීම ලබාගත හැකි වීම මෙම ශිෂ්‍ය ශිෂ්‍යාවන්ට ලැබෙන මහඟු අවස්ථාවක් වේවි.”
IIHS ආයතනයේ ප්‍රධාන විධායක නිලධාරී/සම-නිර්මාතෘ වෛද්‍ය කිත්සිරි එදිරිසිංහ මහතා මෙහිදී මෙසේ අදහස් පළකළේ ය. “ශ්රී ලාංකීය බැංකු ක්ෂේත්‍රයේ මෙන්ම තිරසාර සංවර්ධනයේ ප්‍රවර්ධන කටයුතුවල පුරෝගාමියෙකු වන DFCC බැංකුව යනු විශ්වාසනීය හවුල්කරුවෙකු ලෙස අප දකිනවා. නිසි සුදුසුකම් සපිරූ හෙද සහ සාත්තු සේවා වෘත්තිකයන්ට ශ්රී ලංකාවේ මෙන්ම විදේශ රටවල ඇති ඉල්ලුම ඉතා ඉහළයි. ලන්ඩනයේ Coventry University සමග එක්ව පිරිනමන අපගේ උපාධි පාඨමාලාව, හෙද සේවා ක්ෂේත්‍රය තුළ සාර්ථක වෘත්තීය ජීවිතයක් ගොඩනංවා ගැනීමට බලාපොරොත්තු වන කාටත් ඇති ඉතා හොඳ තේරීමක්. ඒ බලාපොරොත්තුව යථාර්ථයක් බවට පත්කරගැනීම සඳහා මුදල් සපයා ගැනීමට අපේක්ෂා කරන ශිෂ්‍ය ශිෂ්‍යාවන්ට මෙම විශේෂ ණය යෝජනා ක්‍රමය මහඟු පිටිවහලක් වේවි.”
මේ අනුව මින් ඉදිරියට මෙරට හෙද සේවා ක්ෂේත්‍රයේ ශිෂ්‍ය ශිෂ්‍යාවන්ට පිළිගත් මූල්‍ය ආයතනයක් වෙතින් ඵලදායී අධ්‍යාපන ණය පහසුකමක් ලබාගනිමින් තම අධ්‍යාපන ඉලක්ක ළඟාකරගැනීමට හැකියාව ලැබෙනු ඇත. මෙම ණය පහසුකම භාවිතා කරමින්, ජාත්‍යන්තර තලයේ උපාධියක් ශ්රී ලංකාව තුළම හැදෑරීම තුළින් ඔවුන්ට ඉතාමත් සාර්ථක වෘත්තීය ජීවිතයක් ගොඩනංවා ගැනීමට හැකිවනු නො-අනුමාන ය.
DFCC බැංකුව පිළිබඳව
DFCC බැංකුව වසර 68 කට අධික ප්‍රෞඪ උරුමයක් හිමි, ශ්රී ලංකාවේ ප්රමුඛතම මූල්‍ය සමාගමකින් පැවත එන, පුළුල් පරාසයක පැතිරුණු වාණිජ හා සංවර්ධන බැංකු සේවාවන් සපයන වාණිජ බැංකුවකි. හරිත මූල්‍යකරණයට සහ තිරසාර හා සමාජයීය ව්‍යවසායකයන්ට අත්වැලක් වෙමින්, රටේ තිරසාර ආර්ථික සංවර්ධනයට දායක විය හැකි ශක්තිමත් ව්‍යාපාර නිර්මාණය කිරීම ඇතුළුව, වඩාත් ශක්තිමත් දේශයක් බිහිකිරීම උදෙසා උරදෙන ප්රමුඛතම බැංකු අතරින් එකක් බවට පත්වීම, DFCC බැංකුවේ 2020-2030 තිරසාරත්ව ක්‍රමෝපායේ එක් ප්‍රධානතම ඉලක්කයක් වී තිබේ.
Green Climate Fund (GCF) සහතිකකරණය හිමිකරගත් ශ්රී ලංකාවේ ප්‍රථම (සහ මේ දක්වා එකම) බැංකුව වන්නේ DFCC බැංකුවයි. මෙය DFCC බැංකුව තිරසාරත්වය උදෙසා දක්වන කැපවීම සනාථ කරන සාධකයක් වන අතර, මෙමගින් එම බැංකුවට මෙරට තුළ දේශගුණ විපර්යාසවල බලපෑම අවම කරන සහ එම බලපෑම්වලට අනුගත වීමට උපකාරී වන ව්‍යාපෘතිවලට අත්වැලක් වීම සඳහා සහනදායී මූල්‍ය පහසුකම් ලබාගැනීමට හැකියාව ලැබී තිබේ.
Euromoney වෙතින් හිමි වූ ‘2021 සහ 2022 වසරවල ශ්රී ලංකාවේ මුදල් කළමනාකරණයේ වෙළඳපොළ ප්‍රමුඛයා’ සම්මානය ඇතුළුව DFCC බැංකුව මේ දක්වා සම්මාන හා ඇගයුම් රැසකින් පිදුම් ලබා ඇති අතර, Business Today සඟරාව මගින් එම බැංකුව ශ්රී ලංකාවේ ප්රමුඛතම සමාගම් 40 අතරට නම්කර ඇත. ශ්රී ලංකා මහ බැංකුව මගින් නියාමනය වන DFCC බැංකුව, Fitch Ratings Lanka සමාගම වෙතින් ‘A- (lka) ස්ථාවර’ ශ්‍රේණිය හිමිකරගෙන තිබේ.