පුද්ගලික අංශය නියෝජනය කරන ශ්‍රී ලංකාවේ විශාලතම බැංකුවක් වන හැටන් නැෂනල් බැංකුව කෘෂිකාර්මික හා ඉදිකිරීම් යන්ත්‍රෝපකරණයන්හි ප්‍රමුඛතම සැපයුම්කරුවකු වන United Mercury Group (UMG) සමඟ සුවිශේෂී හවුල්කාරීත්වයක් ඇති කරගත් බව පසුගියදා නිවේදනය කළේය.
මෙහි අරමුණ වන්නේ ගොවීන් හා ඉදිකිරීම් වෘත්තිකයින් සඳහා නව්‍ය ලීසිං විසඳුම් ලබා දෙමින් උසස් තත්වයේ කෘෂි උපකරණ මිලදී ගැනීමේ හැකියාව ලබා දීමයි. HNB Towers හිදී මේ සඳහා වන අවබෝධතා ගිවිසුම අත්සන් කිරීමේ අවස්ථාව වෙනුවෙන් මෙම ආයතන දෙකෙහි ජ්‍යෙෂ්ඨ නිලධාරීන් හා නියෝජිතයින් එක්ව සිටියේය.
මෙහිදී අදහස් දැක්වූ HNB පාරිභෝගික බැංකුකරණ ප්‍රධානී කාංචන කරුණාගම මහතා සඳහන් කර සිටියේ “මෙරට කෘෂිකර්මාන්තය පිළිබඳව අවධානය යොමු කිරීමේදී UMG සමඟ ඇති කරගත් මෙම සහයෝගීතාව ඉතා වැදගත් වනවා. නිරන්තරයෙන් ගොවීන් හා ඉදිකිරීම් කර්මාන්තයේ නියුතු වූවන් වෙනුවෙන් අවශ්‍ය සහයෝගය ලබා දීමට කැපවී කටයුතු කරන HNB හි කැපවීම මෙම සහයෝගීතාව තුළින් තව තවත් ඉදිරියට ගෙන යාමට සමත්ව ඇති අතර එම අංශවල තිරසාරත්වය සඳහා නව්‍ය මූල්‍ය විසඳුම් ඉදිරිපත් කිරීමට අප කටයුතු කරනවා. කෘෂිකර්මාන්තය නංවාලීම තුළින් අපනයනය ඉහළ නැංවීම පමණක් නොව ශක්තිමත් ආර්ථිකයක් බිහි කිරීම වෙනුවෙන් ශ්‍රී ලාංකිකයින්ට වඩා හොඳ සේවාවක් ලබා දීමට අපි බලාපොරොත්තු වනවා” යනුවෙනි.
මේ යටතේ සෑම පාරිභෝගිකයෙකුටම තමන්ට දැරිය හැකි ආකාරයෙන් සකස් කළ පොලී අනුපාත හා ලීසිං පැකේජ ලබා දීමට සැලසුම් කර ඇති අතර කාඩ්පත් හිමියන් සඳහා බර යන්ත්‍රෝපකරණ සේවා සැපයීම, සේවා සැපයීම, අමතර කොටස් හා බැටරි සඳහා විශේෂ වට්ටම් ලබා ගැනීමටද අවස්ථාව හිමි වේ.
තවද අනෙකුත් ප්‍රමුඛ කෘෂිකාර්මික උපකරණ සැපයුම්කරුවන් සමඟ සාර්ථක සහයෝගීතාවය තුළින් මෙරට කෘෂිකර්මය වෙනුවෙන් සහයෝගය දැක්වීමේ නිරන්තර ප්‍රයත්නයක යෙදෙන HNB හාවෙස්ටර් යන්ත්‍ර සහ ඉදිකිරීම් උපකරණවල විශ්වසනීයත්වය හා කාර්යක්ෂමතාව ඉහළ නැංවීමට කටයුතු කර ඇත්තේ කෘෂිකර්මාන්තයේ ඵලදායීතාවද ඉහළ නැංවීමට කටයුතු කරමිනි.
මෙම හවුල්කාරීත්වය යටතේ Matador Combine Harvester සඳහා එන්ජිම, ගියර් පද්ධතිය, HST පද්ධතිය හා චැසිය ආවරණය වන පරිදි වසරක හෝ මීටර් පැය 600ක වගකීමක් ඇතුළත් පැකේජයක් පාරිභෝගිකයින් වෙත ලබා දෙනු ඇත. එසේම මෙය සවි කිරීම හා ප්‍රවාහනය ඇතුලු නොමිලේ service කිරීමේ සේවාවන් 5ක් ලබා දීමද මෙහි විශේෂත්වයකි. මීට අමතරව ලීසිං ගෙවීමේ කාලය තුළ අමතර කොටස් සඳහා 20%ක වගකීමක් සමඟින් අමතර ගාස්තුවකින් තොරව රුපියල් 50,000ක් වටිනා අමතර කොටස් සහ මෙවලම් බහාලුමක් හිමිකර දීමටද ඔවුන් කටයුතු කරනු ඇත.
Matador Construction Machinery පැකේජය යටතේ එන්ජිම, හයිඩ්‍රොලික් පද්ධතිය හා සම්ප්‍රේෂණය සඳහා වසරක හෝ මීටර් පැය 2000ක වගකීමක් ලබා දීමට නියමිතය. නොමිලේ සවිකිරීම හා ප්‍රවාහන පහසුකම් සලසා දෙන අතරම සේවා වාර 3ක්ද නොමිලේ ලබා දෙන මෙහිදී සෑම පැය 250කටම වරක් නොමිලේ පරීක්ෂා කර ගැනීමටද පාරිභෝගිකයින්ට අවස්ථාව උදා වේ. තවද වසරක නොමිලේ සේවා පැකේජයෙන් පසුව අමතර කොටස් සඳහා 10%ක වට්ටමක්ද පාරිභෝගිකයින්ට ලබා ගත හැකිය.
මෙම මිලදී ගැනීම් සිදුකරන පාරිභෝගිකයින් හට HNB General Insurance හි රක්ෂණ පහසුකම් සලසා ගැනීමේ හැකියාවද උදා වෙයි. ඒ යටතේ රුපියල් 100,000ක වටිනා ජීවිත රක්ෂණ ආවරණයක් නොමිලේ පිරිනමන අතර කෘෂි යන්ත්‍රෝපකරණ සඳහා වන ලීසං සඳහා HNB පාරිභෝගිකයින් වෙත රුපියල් මිලියන 4.5ක හදිසි අනතුරු ආවරණයක්ද, HNB Assurance වෙතින් ස්වභාවික මරණයකදී රුපියල් 600,000ක් වටිනා රක්ෂණ ආවරණයක්ද පිරිනමනු ලබයි.