උසස් අධ්‍යාපන ක්ෂේත්‍රය සහ කර්මාන්ත අතර පවතින පරතරය පියවීම සඳහා ශක්තිමත් පියවරක් තබමින්, HUTCH සමාගම සහ NSBM විශ්වවිද්‍යාලය එක්ව සුවිශේෂී අවබෝධතා ගිවිසුමකට එළැඹිණි. මෙම ගිවිසුම මඟින්, විද්‍යාර්ථීින්ගේ කුසලතා හඳුනා ගනිමින් ඒවා වැඩි දියුණු කිරීම මෙන්ම අධ්‍යාපනික වැඩසටහන් වඩාත් පරිපූර්ණ කිරීමට සහ ඔවුන්ගේ ව්‍යවසායකත්ව අපේක්ෂාවන්ට සහාය වීමට මෙම සහයෝගීතාවය මඟින් දෙපාර්ශ්වයටම සමීපව කටයුතු කිරීමට හැකිවනු ඇත.
මෙම සහයෝගීතාව යටතේ, HUTCH සමාගම විසින් විශ්වවිද්‍යාල විද්‍යාර්ථීන්ට සීමාවාසික පුහුණු සහ ආධුනිකත්ව (trainee) අවස්ථා ලබා දීමට කටයුතු කරන අතර, එමඟින් ඔවුන්ට ඉතා වටිනා ප්‍රායෝගික අත්දැකීම් රැසක් ලබා ගැනීමට අවස්ථාව හිමිවේ. මීට අමතරව, NSBM හි පවත්වනු ලබන වැඩමුළු හරහා එහි සේවායෝජක සන්නාමය ගොඩනැංවීමටද මෙම හවුල්කාරිත්වය ඉඩ සලසයි. එමඟින් ප්‍රායෝගික ක්‍රියාකාරකම් සිදුවන ආකාරය පිළිබඳව විද්‍යාර්ථීන් සඳහා ගැඹුරු අවබෝධයක් ලබා දෙන අතරම, අනාගතය දිනන දරුවන් HUTCH විසින් සවිබල ගන්වයි. තවද, knowledge sharing වැඩසටහන සඳහා ද NSBM සහ HUTCH එක්ව කටයුතු කරනු ඇත. ඒ යටතේ, පාඨමාලා සහ විෂය නිර්දේශ සංවර්ධනය සඳහා කර්මාන්තයේ අවශ්‍යතාවන්ට ගැළපෙන යෝජනා ලබා දීම, ක්ෂේත්‍ර චාරිකා සහ පැවරුම් කටයුතු සඳහා (පූර්ව දැනුම් දීම මත) සිසුන්ට සහාය වීම, සහ ආයතන දෙකෙහිම සන්නාම වටිනාකම් පිළිඹිබු වන විශේෂ ව්‍යාපෘති සඳහා සහයෝගයෙන් කටයුතු කිරීම සිදු කෙරේ.
මෙම ගිවිසුම යටතේ, ඉහළ දක්ෂතා සහිත උපාධිධාරීන් තම ආයතනය වෙත එක් කර ගැනීමට HUTCH සමාගමට අවස්ථාව හිමිවනවා. මෙම හවුල්කාරිත්වය මඟින් දෙපාර්ශ්වයටම අන්‍යෝන්‍ය ප්‍රතිලාභ හිමිවන බව ඔවුන් විශ්වාස කරයි. සිසුන්ට වෘත්තීය ජීවිතය සඳහා හැඩගැසිය යුතු ආකාරය පිළිබඳව පුළුල් නිරාවරණයක් සහ වඩාත් යෝග්‍ය පෙර සූදානමක් ලැබෙන අතර, HUTCH සමාගමට කර්මාන්තයේ අවශ්‍යතාවන්ට සරිලන දක්ෂතා සහිත මානව සම්පතක් වෙත ප්‍රවේශ වීමට අවස්ථාව සැලසේ. එමෙන්ම, තෝරාගනු ලබන සේවායෝජකයෙකු ලෙස තම කීර්තිනාමය තවදුරටත් ශක්තිමත් කර ගැනීමටද හැකි වේ.
මෙම හවුල්කාරිත්වය පිළිබඳව අදහස් දක්වමින් HUTCH සමාගමෙහි සාමාන්‍යාධිකාරී (ආයතනික කටයුතු) , මංගල බණ්ඩාර මහතා මෙසේ පැවසීය. “NSBM හරිත සරසවිය සමඟ මෙම ව්‍යාපෘතිය සඳහා හවුල් වීමට ලැබීම අපට මහත් ගෞරවයක්. විශිෂ්ටත්වය, වර්ධනය සහ සිසුන්ගේ සාර්ථකත්වය උදෙසා අප දරන දැක්ම හා සමගාමීව, මෙම සහයෝගීතාව අපට හිමිවිය යුතු සුවිශේෂී අවස්ථාවක් ලෙස අපි විශ්වාස කරනවා. උපාධි අපේක්ෂකයින්ට සහ නවක උපාධිධාරීන්ට මඟ පෙන්වීමටත්, ඔවුන්ගේ වෘත්තීය ජීවිතයට මෙන්ම සමස්ත විදුලි සංදේශ ක්ෂේත්‍රයටම ප්‍රතිලාභ අත්වන අයුරින් හැකියාවන් ගොඩනැංවීමටත් අප බලාපොරොත්තු වෙනවා.”
NSBM විශ්වවිද්‍යාලයේ නියෝජ්‍ය උපකුලපති, මහාචාර්ය චමින්ද රත්නායක මහතා මෙසේ අදහස් පළ කළේය: “නවෝත්පාදනය සහ මානව කේන්ද්‍රීය ප්‍රවේශය සඳහා පිළිගැනීමට ලක් වූ HUTCH සමාගම සමඟ හවුල් වීමට ලැබීම අපට ඉමහත් සතුටක්. මෙම ගිවිසුම මඟින් අපගේ විෂය මාලාව තවදුරටත් වැඩිදියුණු වනු ඇති අතර, සිසුන්ට කර්මාන්තය පිළිබඳ සැබෑ අවබෝධයක් ලබා දීමට මෙන්ම ඔවුන්ගේ ව්‍යවසායකත්ව අභිලාෂයන්ට සහාය වීමට ද හැකිවනු ඇත. ඉදිරි අභියෝගයන්ට මැනවින් මුහුණ දීමට හැකිවන නව වෘත්තිකයන් පරපුරක් බිහි කිරීමට මෙම සහයෝගීතාව ඉවහල් වනු ඇති බව අපි විශ්වාස කරනවා.”තවද, NSBM සමඟ ඇති කරගත් මෙම අවබෝධතා ගිවිසුම තුළින් මෙරට උසස් අධ්‍යාපන ආයතන සමඟ දීර්ඝ කාලීනව රැඳී සිටිමින් ශිෂ්‍ය ප්‍රජාවගේ අධ්‍යාපන කටයුතු සඳහා ශක්තිමත් ආයෝජනයන් සිදු කරයි. මෙලෙස ජාතික වගකීමකට උරදෙමින්, මෙරට උසස් අධ්‍යාපන කටයුතුවල නියැලෙමින් සිටින විද්‍යාර්ථීන් සවිබල ගැන්වීමට HUTCH සමාගම ලබා දෙන්නා වූ දායකත්වය මේ තුළින් මනා ලෙස පිළිබිඹු කරයි.