ආසියාවේ වඩාත්ම තරගකාරී ආයතනික සම්මාන උළෙලක්වන සේවායෝජක සන්නාම සම්මාන උළෙලේදී (Employer Branding Awards) ආසියාවේ හොඳම සේවායෝජක සන්නාම සම්මානයෙන් පිදුම් ලැබීමට Omega Line සමාගම සමත්විය. විසිවැනි වරට සංවිධානය කරන ලද මෙම සම්මාන උළෙල ඉකුත් අගෝස්තු 11 වැනිදා සිංගප්පූරුවේ පෑන් පැසිෆික් හෝටලයේදී පැවැත්වුණි.
Employer Branding Institute, World HRD Congress සහ Stars of the Industry සමූහය එක්ව සංවිධානය කරනු ලබන මෙම සම්මාන උළෙලේ අරමුණ වන්නේ ශක්තිමත් සේවායෝජක සන්නාම ගොඩනැඟීමේ සහ සියලුදෙනා අන්තර්කරණය කරගත් ප්‍රගතිශීලී සේවා සංස්කෘතීන් ගොඩනැඟීමේදී සාර්ථකත්වය පත් සමාගම් ඇගයීම වේ.
මේ අතර 16 වරට පැවැති 2025 CMO Asia සම්මාන උළෙලේදී Omega Line සමූහයේ ප්‍රධාන මානව සම්පත් නිලධාරී ඩබ්.එම්.සී. සම්පත් වීරකෝන් මහතා Top Most HR Leader – Asia ලෙස සම්මානයෙන් පිදුම් ලැබීම ද විශේෂත්වයකි. ගෝලීය අපනයනකරුවෙකු සහ ජනප්‍රිය සේවායෝජකයෙකු ලෙස සමාගමේ තත්ත්වය ශක්තිමත් කිරීම සඳහා වෘත්තීය සංචලතාව, යහපැවැත්ම සහ කාර්ය සාධනය ඒකාබද්ධ කරමින් Omega Line හි මානව සම්පත් ක්‍රමෝපාය සකස්කිරීමෙහිලා වීරකෝන් මහතා අතිශය වැදගත් කාර්යභාරයක් ඉටු කළේය.
″මෙය හුදෙක් පෞද්ගලික ජයග්‍රහණයක් නොව අපේ සමස්ත මානව සම්පත් කණ්ඩායමේ සහ කළමනාකාරීත්වයේ කැපවීම හා විශිෂ්ටත්වය වෙනුවෙන් ලද ඇගයීමක්. ඔවුන්ගේ අඛණ්ඩ සහයෝගයට මාගේ ස්තූතිය පළකරන අතරම, අපගේ අනාගතවාදී ව්‍යාපාර නායකයාවන ෆීලික්ස් ප්‍රනාන්දු මහතාටත් ඔහු ලබාදෙන මඟපෙන්වීමට මාගේ කෘතවේදීත්වය පිරිනමනවා″, යනුවෙන් වීරකෝන් මහතා පැවසුවේය.
මෑතකාලීනව, නවමු මානව සම්පත් ක්‍රමෝපාය මෙහෙයවීම සම්බන්ධයෙන් Omega Line ශ්‍රී ලංකාව තුළ ද පිළිගැනීමට ලක්ව ඇත. 2025 හොඳම කළමනාකරණ පිළිවෙත් සමාගම් සම්මාන උළෙලේදී, ඩිජිටල් සාක්ෂරතා වැඩසටහන් සහ සමාජ වගකීම සඳහා වූ කැපවීම වෙනුවෙන් සමාගම ගෞරවයට පාත්‍ර විය.
″මා බලාපොරොත්තු වූ වෙනස කිසි විටෙකත් ක්‍රියාවලීන්ට පමණක් ලඝුවූවක් නොවේ. හදවතින් මෙන්ම තර්කානුකූලව මෙහෙයවන සංස්කෘතියක් බිහිකිරීම ගැන මා හට විශාල වුවමනාවක් තිබුණි. සැබෑම ගෝලීය සමාගමක් වීමට නම්, අප සියලු දෙනා තුළ, විශේෂයෙන් අපගේ ජ්‍යෙෂ්ඨ නායකත්වය තුළ, විශිෂ්ටත්වය සඳහා වූ එම උනන්දුව පවත්වා ගත යුතුයි″, ප්‍රධාන විධායක නිලධාරී/ කළමනාකාර අධ්‍යක්ෂ ෆීලික්ස් ප්‍රනාන්දු මහතා ප්‍රකාශ කළේය.
‘‘අපි තවමත් එම තත්ත්වයට ළඟා වී නොමැති විය හැකියි. නමුත් අපි එකට එක්ව ඒ කරා ගමන්කරනු ඇති බවට කිසිදු සැකයක් නැහැ. මම මෙහි දෙවන වරටත් Omega Line සමඟ එක්වීමෙන් පසු ඔබ මට ලබා දුන් සහයෝගය සහ දිරිගැන්වීම වෙනුවෙන් Omega Line පවුලේ සෑම සාමාජිකයෙකුටම මම අවංකවම ස්තූතිවන්ත වෙනවා. එය මට වචනවලින් ප්‍රකාශ කළ නොහැකි තරම්″, යනුවෙන් ඔහු වැඩිදුරටත් පැවසුවේය.
නිෂ්පාදන කර්මාන්ත්‍රාශ්‍රිත මෙරට හොඳම සේවා ස්ථාන 15 අතරට ඔමේගා ලයින් ශ්‍රේණිගත කරමින් Great Place to Work Sri Lanka විසින් සමාගමේ ආයතනික සංස්කෘතියට තවත් සහතිකයක් ලබාදී තිබේ. එතුළින් සමාගම කෙරෙහි සේවකයින්ගේ විශ්වාසය පිළිබිඹුවන අතර Omega Line හි ආයතනික වටිනාකම් සහ සංස්කෘතිය පිළිබඳ කදිම සාක්ෂියක් සපයයි.
ඒ අනුව ගත්කල, මෙම ගෞරව සම්මාන දෙකම හුදෙක් සංකේතාත්මක ජයග්‍රහණවලට වඩා වැඩි යමක් ප්‍රකාශ කරයි. ශ්‍රී ලාංකික සමාගම්වලට කාර්යක්ෂමතාව සහ පරිමාණයෙන් පමණක් නොව ඔවුන්ගේ සේවක ශක්තියෙන් ද ගෝලීය වශයෙන් තරග කළ හැකි ආකාරය ඉන් පිලිබිඹු කරයි. Omega Line සමාගමට සහ සම්පත් වීරකෝන් වැනි නායකයින්ට, දැන් පවතින අභියෝගය වන්නේ මෙම ගම්‍යතාවය තවදුරටත් පවත්වා ගනිමින් සහ එය දෛනික වැඩකටයුතුවලට ඇතුළත් කරමින් සහ ආසියාවේ හොඳම සේවා යෝජකයෙකු ලෙස සමාගමේ කීර්ති නාමය අඛණ්ඩව පවත්වාගත හැකි බව සහතික කිරීමයි.
Oniverse (මීට පෙර Calzedonia) සමාගම් ජාලයට අයත් Omega Line සමාගම, යුරෝපයට ඇඟලුම් අපනයනය කරන දැවැන්තම ශ්‍රී ලාංකික සමාගමකි. වාර්ෂිකව ඇඟලුම් මිලියන 100කට වඩා නිෂ්පාදනය කරන සමාගම, සඳලංකාව සහ වවුනියාව කර්මාන්තශාලා හරහා 7,500කට වැඩි රැකියා ප්‍රමාණයක් ජනනය කරතිබේ. Omega Line ශ්‍රී ලංකාවේ එහි ආශ්‍රිත සමාගම් සමඟ ඇමරිකානු ඩොලර් මිලියන 450කට වඩා ආයෝජනය කර ඇත. සමාගමේ වාර්ෂික අපනයන වටිනාකම ඇමරිකානු ඩොලර් මිලියන 500 ක් පමණවන අතර වාර්ෂික අපනයන ඒකක ප්‍රමාණය මිලියන 200 ඉක්මවයි. ඊට සමගාමීව සේවකයින්ගේ කුසලතා සංවර්ධනය සහ සේවා ස්ථාන බලගැන්වීම සඳහා ද සමාගම දැවැන්ත කැපවීමක් සිදුකරන අතර, සිය සාර්ථකත්වය ශ්‍රම බලකායේ ශක්තියෙන් වෙන් කළ නොහැකි බවට සමාගමේ දැඩි විශ්වාසය යි.