ඒකාබද්ධ ඇඟලුම් සංගම් සංසදය (JAAF) හා සිවිල් සමාජ සංවිධානයක් වන Solidaridad එක්ව යුරෝපා සංගමයේ ආයතනික තිරසරභාවය සඳහා වන Due Diligence Directive (CSDDD) සම්බන්ධයෙන් පසුගියදා කොළඹදී එක් දින වැඩමුලුවක් සංවිධානය කරන ලදී.
2023 වසරේදී හඳුන්වාදෙනු ලැබූ CSDDD ට අනුව යුරෝපා සංගමය සමඟ කටයුතු කරන සැපයුම් දාමයන් විසින් දැඩි පාරිසරික හා මානව හිමිකම් ප්‍රමිතීන් සපුරාලීම අත්‍යාවශ්‍ය වේ. මෙම සුදුසුකම් සඳහා ශ්‍රී ලාංකේය සැපයුම්කරුවන් ඍජුවම අනුකූල විය යුතු නොමැති වුවද මෙරට ඇඟලුම් අපනයනයෙන් 30%ක් පමණ වන යුරෝපා සංගම් වෙළෙඳපොලෙහි තරඟකාරීව කටයුතු කිරීමට මෙම ප්‍රමිතීන්ට අනුකූල වීම අත්‍යාවශ්‍ය වේ. මෙම අපනයනයනවලින් 80%ක් පමණ ඉතාලිය, ජර්මනිය, නෙදර්ලන්තය හා ප්‍රංශය වෙත සිදු කරන බැවින් මෙම අනුකූලතාවය තව තවත් වැදගත් වනු ඇත.
මෙම වැඩමුලුව මඟින් අවදානම් තක්සේරුව, තිරසාරතා ප්‍රමිතීන් හා කාර්යක්ෂම වාර්තාකරණය පිළිබඳ ක්‍රියාකාරී අවබෝධයක් දේශීය ව්‍යාපාරයන් වෙත ලබා දෙමින් ඉහළ යන ගෝලීය අපේක්ෂාවන් සපුරාලීමේ සැලසුමක් ඉදිරිපත් කරන ලදී.
CSDDD අවශ්‍යතා සපුරාලීම සඳහා ශ්‍රී ලාංකේය සැපයුම්කරුවන්ට මඟ පෙන්වීමේ උපාය මාර්ගික හවුල්කාරීත්වයක් ස්ථාපිත කරමින් JAAF සහ Solidaridad අතර අවබෝධතා ගිවිසුමක් අත්සන් කිරීමටද කටයුතු කරනු ලැබීය. තිරසාර මූලාශ්‍රයන්ට ප්‍රමුඛත්වය ලබා දෙන සන්නාම සඳහා විශ්වාසදායක සැපයුම්කරුවකු ලෙස එහි තත්වය පවත්වා ගැනීමට කර්මාන්තයේ හැකියාව ඉහළ නැංවීම වෙනුවෙන් මෙම සහයෝගීතාවය ඉවහල් වනු ඇත.
මේ සම්බන්ධයෙන් අදහස් දැක්වූ JAAF යොහාන් ලෝරන්ස් මහතා සඳහන් කර සිටියේ “ගෝලීය ප්‍රමිතීන්ට අනුකූලව තිරසාරභාවය හා ආචාර ධාර්මික ව්‍යාපාර, සාර්ථකත්වය වෙනුවෙන් අත්‍යාවශ්‍ය දෙයක් බව ශ්‍රී ලංකාවේ නිරන්තර පිළිගනු ලබනවා. මෙම වැඩමුලුව හා Solidaridad සමඟ වන අපගේ හවුල්කාරීත්වය වෙනස් වන ගෝලීය වෙළෙඳ ප්‍රමිතීන්ට හැඩගැසීමේ හැකියාව ශ්‍රී ලංකාවේ කර්මාන්තවලට ලබා දීම සඳහා වන තීරණාත්මක පියවරක් ලෙස සඳහන් කළ හැකියි. CSDDD සමඟ කටයුතු කිරීම තුළින් ගෝලීය වෙළෙඳපොළ ප්‍රමුඛ සැපයුම්කරුවකු ලෙස අපගේ ස්ථානය සුරක්ෂිත කර ගැනීමටද අවස්ථාව උදා වනවා” යනුවෙනි.
මෙම අවස්ථාව සඳහා යුරෝපා සංගමයේ ශ්‍රී ලංකාව හා මාලදිවයින සඳහා නියෝජ්‍ය ප්‍රධානී Lars Bredal සහ නෙදර්ලන්තයේ නියෝජ්‍ය දූත ප්‍රධානී Iwan Rutjens ඇතුලු යුරෝපයේ සම්භාවනීය අමුත්තන් රැසක් එක්ව සිටි අතර ඒ තුළින් එම අවස්ථාවෙහි වැදගත්කමද මනාව පිළිබිඹු විය.
මෙම නව ප්‍රමිතීන් අවබෝධ කර ගැනීම හා ක්‍රියාත්මක කිරීම වෙනුවෙන් ඇඟලුම් ක්ෂේත්‍රයට සහාය දැක්වීමේ වැදගත්කම අවධාරණය කළ JAAF මෙම වැඩසටහන සාර්ථක කර ගැනීම සඳහා සහයෝගය ලබා දුන් FAAMA හි ලේකම් ෂාහිඩ් සංගානිට විශේෂ ස්තුතිය පළ කිරීමටද කටයුතු කළේය.
මෙම අභියෝගවලට මුහුණ දීමට අවශ්‍ය මෙවලම්වලින් කර්මාන්තය සන්නද්ධ කිරීම තුළින් ගෝලීය වෙළෙඳපොල තුළ තරඟකාරීත්වය තහවුරු කරමින් සදාචාරාත්මක හා තිරසාර නිෂ්පාදනයේ ප්‍රමුඛයා ලෙස ශ්‍රී ලංකාවේ විශිෂ්ටත්වය තව දුරටත් ඉදිරියට ගෙන යාම JAAF සහ Solidaridad හි අරමුණ වී ඇත.
