ශ්‍රී ලංකාවේ විවිධාංගීකරණය වූ සමාගම් සමූහයක් වන සන්ෂයින් හෝල්ඩින්ග්ස් 2026 මූල්‍ය වර්ෂය සඳහා ශක්තිමත් පිරිවැටුමක් සහ බදු පසු ලාභයක් වාර්තා කිරීමට සමත්ව ඇත. සමූහය FY26 පළමු කාර්තුව සඳහා රු. බිලියන 15.9ක ඒකාබද්ධ ආදායමක් වාර්තා කර ඇත. එය පසුගිය වසරට සාපේක්ෂව 11.6%ක වර්ධනයක් වන අතර ඔවුන්ගේ බදු පසු ලාභය (PAT) පසුගිය වසරට සාපේක්ෂව 20.6% කින් රු. බිලියන 1.7 ක් දක්වා වර්ධනය වී ඇත. යහපත් ආර්ථික තත්ත්වයන් සහ පාරිභෝගික ක්‍රියාකාරකම් වැඩිවීම හේතුවෙන් සන්ෂයින් සමූහය එහි ප්‍රධාන අංශ වන සුව සේවා, පාරිභෝගික සහ කෘෂි ව්‍යාපාර යන අංශවල ධනාත්මක වර්ධනයක් අඛණ්ඩව පෙන්නුම් කර ඇත.
සමූහය ලබා ගත් මෙම ඉහළ වර්ධනයට සුව සේවා අංශය විශාල දායකත්වයක් ලබා දුන් අතර එය මුළු ආදායමෙන් 54.2% කි. මේ අතර පාරිභෝගික අංශය 30.1% ක් ද කෘෂි ව්‍යාපාර අංශය 15.7% ක් ද වශයෙන් සමූහයේ මුළු ආදායමට දායක විය. දළ ලාභය පසුගිය වසරට සාපේක්ෂව 22.3% කින් රුපියල් බිලියන 5.1 ක් දක්වා ඉහළ ගිය අතර දළ ලාභ ආන්තිකය පදනම් ලකුණු 277 (bps) කින් 31.8% ක් දක්වා වර්ධනය විය. කෘෂි ව්‍යාපාර සහ පාරිභෝගික අංශවල ඉහළ ලාභ ආන්තිකය මෙම වර්ධනයට මූලික වශයෙන් හේතු විය.
මෙම මූල්‍ය ප්‍රතිඵල පිළිබඳව අදහස් දක්වමින් සන්ෂයින් සමූහයේ ප්‍රධාන විධායක නිළධාරී ශ්‍යාම් සතාසිවම් මහතා පැවසුවේ “පසුගිය වසරේ සිදු කරන ලද උපායමාර්ගික ආයෝජන මගින් ආදායමෙහි සහ ලාභයේ ඉහළ වර්ධනයක් සමඟින්, 2026 මූල්‍ය වර්ෂය සඳහා අප ශක්තිමත් ආරම්භයක් ලබා ගෙන තිබෙනවා. ආර්ථිකයේ දියුණුව සහ පාරිභෝගික වියදම් ක්‍රමයෙන් යථා තත්ත්වයට පත්වීම අපගේ මෙම මූල්‍ය ප්‍රතිඵලවලින් පෙන්නුම් කරනවා. විශේෂයෙන් සුව සේවා අංශය සමූහයේ මෙම මූල්‍ය ප්‍රතිඵල සඳහා විශාල දායකත්වයක් ලබා දෙනු ලැබුවා. ඒවගේම පාරිභෝගික අංශය ක්‍රමයෙන් යථා තත්ත්වයට පත්වීමේ සලකුණු පෙන්නුම් කරන බැවින් අප වෙළඳ නාම ප්‍රතිරූපය වැඩිදියුණු කිරීම, නව නිෂ්පාදන හඳුන්වා දීම සහ අපනයන පුළුල් කිරීම වැනි ක්‍රියාකාරකම් කෙරෙහි වැඩි අවධානයක් යොමු කර තිබෙනවා. ස්ථාවර මිල හා පිරිවැය කළමනාකරණය වැනි සාධක හේතුවෙන් කෘෂි ව්‍යාපාර අංශය ද අඛණ්ඩව ශක්තිමත් වර්ධනයක් පෙන්නුම් කරනවා. සමස්තයක් වශයෙන් සමූහය උපායමාර්ගික ආයෝජන සිදු කිරීමෙන් සහ මෙහෙයුම් ශක්තිමත්ව පවත්වා ගෙන යාම තුළින් දිගුකාලීන වටිනාකම් ගොඩනැගීමට කැපවී සිටිනවා.” යනුවෙනි.
සුව සේවා අංශය
සමාලෝචනය කරන ලද කාල පරිච්ඡේදය තුළ සමූහයේ සුව සේවා අංශය පළමු කාර්තුවේදී රුපියල් බිලියන 8.6ක ආදායමක් වාර්තා කර ඇති අතර එය පසුගිය වසරට සාපේක්ෂව 14%ක කැපී පෙනෙන වර්ධනයකි. මෙයට ඖෂධ බෙදාහැරීම, වෛද්‍ය උපකරණ, ෆාමසි සහ ඖෂධ නිෂ්පාදනයෙන් ලැබෙන ආදායම ඇතුළත් විය. පසුගිය වසරට සාපේක්ෂව ඖෂධ බෙදා හැරීමේ ව්‍යාපාරය 26.7% ක සහ වෛද්‍ය උපකරණ අංශය 17.2% ක ආදායම් වර්ධනයක් වාර්තා කරමින් මෙම මූල්‍ය ප්‍රතිඵල සඳහා ඉහළ දායකත්වයක් ලබා දුන්නේය. මෙම කාර්තුවේදී Healthguard Distribution හි ව්‍යාපාර ආකෘතියේ සිදු කළ වෙනස්කම් සහ නව උපායමාර්ගික හවුල්කාරීත්වයන් හේතුවෙන් Healthguard Distribution පසුගිය වසරට සාපේක්ෂව 44.5% ක ඉහළ ආදායම් වර්ධනයක් වාර්තා කළේය.
මේ අතර හෙල්ත්ගාර්ඩ් ෆාමසි හි ආදායම සලකා බලනු ලබන කාල පරිච්ඡේදය තුළ 17.4% ක වර්ධනයක් පෙන්නුම් කර ඇත. කෙසේ වෙතත් රජයේ බෙදා හැරීම් කාලසටහන්වල ප්‍රමාදයන් හේතුවෙන් සමූහයේ ඖෂධ නිෂ්පාදන ව්‍යාපාරය වන ලීනා මැනිෆැක්චරින් පුද්ගලික සමාගමේ ආදායම 19.6%ක පහළ යාමක් අත්විඳින ලදී.
පාරිභෝගික අංශය
දේශීය හා අපනයන වෙළඳපොළවල වර්ධනය හේතුවෙන් FY26 පළමු කාර්තුවේදී පාරිභෝගික අංශයේ ආදායම පසුගිය වසරට සාපේක්ෂව 3.7% කින් රු. බිලියන 4.8 ක් දක්වා ඉහළ ගියේය. දේශීය පාරිභෝගික ව්‍යාපාරය පසුගිය වසරට සාපේක්ෂව 4.5% ක ආදායම් වර්ධනයක් සමඟින් ශක්තිමත් කාර්යසාධනයක් වාර්තා කළ අතර මෙයට ප්‍රධාන වශයෙන් හේතුවූයේ පසුගිය වසරට සාපේක්ෂව රසකැවිලි අංශයේ ආදායම 19.9%කින් ඉහළ යාමයි. සන්නාමගත තේ කාණ්ඩයේ විකුණුම් ප්‍රමාණය හා වටිනාකම අදාල කාර්තුවේදී සුළු වශයෙන් වර්ධනය විය. මීට අමතරව සමූහයේ අපනයන ව්‍යාපාරය FY26 පළමු කාර්තුවේදී හොඳින් ක්‍රියාත්මක වෙමින් පසුගිය වසරට සාපේක්ෂව අපනයන ආදායම 7.2% ක වර්ධනයක් පෙන්නුම් කරයි.
කෘෂි ව්‍යාපාර අංශය
සමූහයේ කෘෂි ව්‍යාපාර අංශය නියෝජනය කරන වටවල වැවිලි සමාගම රු. බිලියන 2.5 ක ආදායමක් වාර්තා කර ඇති අතර එය පසුගිය වසරට සාපෙක්ෂව 20.7%ක කැපී පෙනෙන වර්ධනයකි. මෙම වර්ධනයට ප්‍රධාන වශයෙන් හේතු වූයේ පාම් ඔයිල් ව්‍යාපාරයේ ශක්තිමත් කාර්යසාධනයයි. පාම් ඔයිල් සඳහා හොඳ මිලක් හිමි වීම හා විකුණුම් ප්‍රමාණය ඉහළ යාම හේතුවෙන් එම අංශයේ ආදායම පසුගිය වසරට සාපේක්ෂව 27.2%කින් වර්ධනය විය. මේ අතර කිරි ආශ්‍රිත ව්‍යාපාරය රු. මිලියන 278.5ක ආදායමක් වාර්තා කළ අතර එය පසුගිය වසරට සාපේක්ෂව 14.6%ක පහළ යාමකි. කෘෂි ව්‍යාපාර අංශයේ ආදායම පහත වැටුණද FY26 පළමු කාර්තුවේදී පොලී සහ බදු පෙර ඉපැයීමේ (EBIT) වෙනස පසුගිය වසරේ එම කාල පරිච්ඡේදයේදී වාර්තා කළ 38.8% ට සාපේක්ෂව 48.8% දක්වා ඉහළ ගියේය. මෙම වර්ධනයට ප්‍රධාන වශයෙන් හේතු වූයේ පාම් ඔයිල් අංශයේ ශක්තිමත් ආදායම් වර්ධනය සහ පාම් ඔයිල් ව්‍යෘපාරයේ පිරිවැය කළමනාකරණයයි.
සන්ෂයින් හෝල්ඩින්ග්ස් යනු ශ්‍රී ලංකා ආර්ථිකයේ සුව සේවා, පාරිභෝගික සහ කෘෂි ව්‍යාපාර යන අංශවල උපායමාර්ගික ආයෝජන සමඟ වටිනාකමක් ඇති කරමින් “ජාතිය ගොඩනැගීමට” දායකත්වයක් දක්වන සමූහ ව්‍යාපාරයකි.1967 දී ආරම්භ කරන ලද මෙම සමූහය සේවකයින් 1,900 කට අධික සංඛ්‍යාවකින් සහ FY25 සඳහා රු. බිලියන 59.3ක ආදායමක් සමඟින් මේ වන විට Zesta Tea, Watawala Tea, Ran Kahata, Daintee, Milady, Healthguard Pharmacy සහ Lina Manufacturing වැනි ප්‍රමුඛ පෙළේ ශ්‍රී ලාංකේය සන්නාමවලට නිවහන සපයයි. සමූහයේ ව්‍යාපාරික ඒකකවලට Sunshine Healthcare Lanka, Sunshine Consumer Lanka සහ Watawala Plantations PLC ඇතුළත් වන අතර, ඒවා අදාළ අංශවල පුරෝගාමීන් වේ. ඒවායින් බොහොමයක් ආයතන 2024 දී ද ‘’Great Place to Work” සහතිය හිමි කරගෙන තිබීම විශේෂත්වයකි.
