HUTCH සහ ශ්‍රී ලංකා තොරතුරු තාක්ෂණ ආයතනය [Sri Lanka Institute of Information Technology (SLIIT)] අතර හවුල්කාරීත්වයකට පසුගියදා අත්සන් තබන ලදී. HUTCH විසින් ක්‍රියාවට නංවා ඇති Future Connect වැඩසටහන වෙනුවෙන් මෙම හවුල්කාරීත්වය ඇතිකරගන්නා ලදි. මේ යටතේ SLIIT ආයතනයේ ශිෂ්‍ය ශිෂ්‍යාවන්ට HUTCH ආයතනය මඟින් ව්‍යාපාර ක්ෂේත්‍රය පිළිබදව දැනුම බෙදාගැනීමේ සැසි මාලාවක් සහ HUTCH දත්ත එක්රැස් කිරීමේ මධ්‍යස්ථාන (Data Centers) දැකබලා ගැනීමටද අවස්ථාව හිමිවනු ඇත.
මේ සඳහා වන අවබෝධතා ගිවිසුමට 2025 ජනවාරි 30 දින අත්සන් තබන ලදි. මෙමගින් SLIIT ආයතනයේ ශිෂ්‍ය ශිෂ්‍යාවන්ට දත්ත විශ්ලේෂණය, තොරතුරු තාක්ෂණය, ජාලකරණය, මූල්‍ය සහ මානව සම්පත් වැනි අංශ සම්බන්ධයෙන් ප්‍රායෝගික දැනුමක් හා පුහුණුවක් ලැබෙනු ඇති අතර, එය ඔවුන්ට අදාළ ක්ෂේත්‍ර තුළ රැකියා සඳහා අයදුම්කිරීමේදී අතිශයින් වැදගත් වනු ඇත.
මේ සම්බන්ධයෙන් අදහස් දක්වමින් HUTCH සාමාන්‍යාධිකාරී මංගල බණ්ඩාර මහතා පැවසුවේ, මෙය උසස් අධ්‍යාපනය සහ ව්‍යාපාර ක්ෂේත්‍රයේ ඉල්ලුම අතර පරතරය අවම කිරීම සඳහා HUTCH දරණ උත්සාහයේ තවත් පියවරක් බවයි. මෙම වැඩසටහන ඔස්සේ ශිෂ්‍ය ශිෂ්‍යාවන්ට ව්‍යාපාර ක්ෂේත්‍රය පිළිබඳව වඩාත් පැහැදිලි අවබෝධයක් සමගින් ප්‍රායෝගික අත්දැකීම් ලබාගැනීමට අවස්ථාව හිමි වේ. මෙරට ප්‍රධානතම දුරකථන සමාගමක් වශයෙන්, ක්ෂේත්‍රයේ දීර්ඝකාලීන සාර්ථකත්වය හා තිරසාරත්වය උදෙසා අධ්‍යාපනය සහ කුසලතා සංවර්ධනය වෙනුවෙන් ආයෝජනය කිරීම අත්‍යාවශ්‍ය බව HUTCH සමාගම විශ්වාස කරන බව මංගල බණ්ඩාර මහතා වැඩිදුරටත් පැවසීය.
මේ අතර SLIIT ආයතනයේ ජ්‍යෙෂ්ඨ නියෝජ්‍ය උප කුලපති මහාචාර්ය නිමල් රාජපක්ෂ මහතා කියා සිටියේ, සිසුන්ට න්‍යායික දැනුම සහ ප්‍රායෝගික අත්දැකීම් ලබාදෙමින් ඔවුන්ට අනාගතයේදී සාර්ථක වෘත්තිකයන් බවට පත්වීමට අවස්ථාව උදාකර දීම සඳහා අධ්‍යාපන ආයතන, ව්‍යාපාර ක්ෂේත්‍රය අතර මෙබඳු හවුල්කාරීත්වයන් ඇතිකර ගැනීම අතිශයින් වැදගත් බවයි. මෙම උත්සාහය වෙනුවෙන් HUTCH සමග අත්වැල් බැඳගැනීමට හැකි වීම පිළිබඳව තමන් සතුටු වන බවත්, මෙම හවුල්කාරීත්වය SLIIT ආයතනයේ ශිෂ්‍ය ශිෂ්‍යාවන්ගේ දියුණුව වෙනුවෙන් මෙන්ම ශ්‍රී ලංකාවේ තොරතුරු තාක්ෂණ හා ව්‍යාපාර ක්ෂේත්‍රවල දියුණුව වෙනුවෙන් කේන්ද්‍රීය දායකත්වයක් දක්වනු ඇති බවත් මහාචාර්ය නිමල් රාජපක්ෂ මහතා වැඩිදුරටත් පැවසීය.
මෙරට ශිෂ්‍ය ප්‍රජාව සහ ව්‍යාපාර ක්ෂේත්‍රය අතර අර්ථවත් සම්බන්ධතා නිර්මාණය කිරීම සඳහා HUTCH විසින් මෙම වැඩසටහනට අමතරව තවත් වැඩසටහන් රාශියක් ක්‍රියාවට නංවා ඇත. එම වැඩසටහන් ඔස්සේ මෙරට වෘත්තීය කුසලතා සංවර්ධනයට සුවිශාල දායකත්වයක් දැක්වීමට HUTCH සමාගමට හැකි වී තිබේ. රටේ ආර්ථික සංවර්ධනයට දායක විය හැකි, දැනුමින් හා අත්දැකීම්වලින් පිරිපුන් ශ්‍රම බලකායක් නිර්මාණය කිරීම සඳහා මෙවැනි වැඩසටහන් අතිශයින් වැදගත් බව HUTCH විශ්වාස කරයි.
HUTCH Sri Lanka පිළිබඳව
ශ්‍රී ලංකාවේ දුරකථන සන්නිවේදන ක්ෂේත්‍රයේ ප්‍රමුඛයෙකු වන HUTCH Sri Lanka සමාගම, CK Hutchison Holdings (CKHH) හි අනුබද්ධ සමාගමකි. හොංකොං පදනම් කරගත් Fortune 500 සමාගමක් වන, රටවල් 50 කට අධික සංඛ්‍යාවක ව්‍යාප්ත වී ඇති CK Hutchison Holdings සමාගම ප්‍රධාන ක්ෂේත්‍ර 6 තුළ ක්‍රියාත්මක වන අතර එය 2023 වසරේදී ඇමරිකානු ඩොලර් බිලියන 60 කට ආසන්න ආදායමක් වාර්තා කිරීමට සමත් විය.
1997 වසරේදී මෙරට තුළ ව්‍යාපාර කටයුතු ආරම්භ කළ HUTCH විසින් 2004 වසරේදී GSM සේවාවන් දියත් කරන ලද අතර, ඉන් අනතුරුව 2011 වසරේදී 3G සේවාවන්ද, 2018 වසරේදී 4G සේවාවන්ද හඳුන්වා දෙන ලදි. 2019 වසරේදී Etisalat Sri Lanka සමාගම අත්පත් කරගැනීමත් සමග HUTCH හි වෙළඳපොළ ආවරණය තවදුරටත් ශක්තිමත් වූ අතර, ඒ හේතුවෙන් පාරිභෝගිකයන්ට 078 මෙන්ම 072 අංක යටතේ ජංගම දුරකථන සේවාවන් පිරිනැමීමට සමාගමට හැකියාව ලැබිණි. මේ වන විට HUTCH 4G ජාලය මගින් ශ්‍රී ලාංකික ජනගහනයෙන් 95% ක්ම ආවරණය වන අතර, ඉදිරියේදී රටේ ඩිජිටල් සැලසුම්වලට අත්වැලක් වෙමින් 5G සේවාවන්ද හඳුන්වා දීමට සමාගම සැලසුම් කර ඇත.
රටේ දුරබැහැර ප්‍රදේශවල ජනතාවට පවා සන්නිවේදනය, ව්‍යාපාර කාර්යක්ෂමතාව සහ විනෝදාස්වාදය සඳහා අවශ්‍ය දුරකථන සන්නිවේදන පහසුකම් සපයන HUTCH, සහනදායී හා විශ්වාසනීය සම්බන්ධතා පහසුකම් ඔස්සේ මෙරට දුරකථන සන්නිවේදනය ක්ෂේත්‍රයේ දියුණුව වෙනුවෙන් කැපීපෙනෙන මෙහෙවරක් ඉටුකරමින් සිටී.
