INSEE සිමෙන්ති (Siam City Cement (Lanka) Limited), යනු INSEE සංස්ථා සහ මහවැලි මැරීන් ප්ලස් යන ලංකාවේ ප්‍රමුඛතම සිමෙන්ති සන්නාම නිපදවන වෙළඳපොළ ප්‍රමුඛයා වන අතර, ශ්‍රී ලංකාවේ එකම පූර්ණ ඒකාබද්ධ සිමෙන්ති නිෂ්පාදකයා ද වේ. ශ්‍රී ලංකාවේ National Cleaner Production Centre (NCPC) මධ්‍යස්ථානයෙන් පිරිනමන ‘EcoLabel’ සහතිකය හිමි කරගන්නට INSEE සිමෙන්ති සමාගමට පසුගිය දා අවස්ථාව උදා වූ අතර, මෙම සහතිකයෙන් පිදුම් ලත් ලංකාවේ පළමු සිමෙන්ති සමාගම ද මෙය වේ.
රටේ ඉදිකිරීම් කර්මාන්තයේ ඓතිහාසික සන්ධිස්ථානයක් සනිටුහන් කරන සිදුවීමක් වූ මෙම සුවිශේෂී ජයග්‍රහණය, තිරසරභාවය, නවෝත්පාදනය හා පාරිසරික වගකීම සම්බන්ධයෙන් INSEE දක්වන කැපවීම නැවතත් තහවුරු කරන්නට ද සමත් විය.
EcoLabel සහතිකය යනු පාරිසරික ක්‍රියාකාරීත්වයේ ඉහළම නිර්ණායකයන් සපුරන නිෂ්පාදන සහ සංවිධාන සඳහා ගෝලීය වශයෙන් පිරිනමන ප්‍රමිතියකි. ශ්‍රී ලංකාවේ නිල ගෝලීය Ecolabelling Network (GEN) සාමාජිකයා ලෙස කටයුතු කරන NCPC විසින් ISO 14024 Type I ප්‍රමිතීන් සපුරන ලද බවට සහතික කරමින් මෙම සහතිකය නිකුත් කර ඇත. නිර්ණායක රැසක් පදනම් කරගනිමින්, නිෂ්පාදන හා සේවා සම්බන්ධයෙන් තෙවන පාර්ශවයක් විසින් පිරිනමන විශ්වසනීය සහතිකයක් ලෙස ද EcoLabel ප්‍රමිතිය හැඳින්වේ. මෙම ප්‍රමිතිය හිමි කරගැනීම තුළින්, INSEE සිමෙන්ති ශ්‍රී ලංකාවේ ගොඩනැඟිලි ද්‍රව්‍ය ක්ෂේත්‍රය වෙත නව පූර්වාදර්ශයක් සපයන්නට සමත්ව ඇති අතර, තිරසර ඉදිකිරීම් පිළිවෙත් මෙහෙයවීමේලා සමාගම හිමි කරගෙන ඇති නායකත්වය ද ශක්තිමත් කරයි.
පරිසර හිතකාමී නිෂ්පාදනයේ පුරෝගාමියෙකු ලෙස තම ස්ථානය තවදුරටත් පවත්වා ගනිමින්, පාරිසරික නිෂ්පාදන ප්‍රකාශනය (EPD) හිමි කරගෙන ඇති එකම ආයතනය ද වන්නේ INSEE සිමෙන්ති සමාගමයි. මෙම ප්‍රමිති සහතික සියල්ල තුළින් පෙනී යන්නේ, පාරිසරික බලපෑම අවම කිරීම හා උසස්ම තත්ත්වයේ විශ්වසනීය සිමෙන්ති විසඳුම් වෙළඳපොළට හඳුන්වා දීමට INSEE විසින් ලබා දෙන පරිපූර්ණ ප්‍රවේශයයි.
“මෙම ජයග්‍රහණය INSEE සමාගමට මෙන්ම ශ්‍රී ලංකාවටත් ආඩම්බර විය හැකි අවස්ථාවක් ලෙස අප දකිනවා. EcoLabel සහතිකය ලබාගත් රටේ පළමු සිමෙන්ති සමාගම බවට පත්වීම තුළින් අනාගත පරපුර වෙත තිරසර හා වගකීමෙන් යුතු නායකත්වය ද පෙන්නුම් කිරීමට අප සමත්ව තිබෙනවා. ශක්තිමත් ඉදිකිරීම් තුළින් හරිතවත් ජාතියක් ගොඩනැඟීමේ මෙහෙවර උදෙසා නිරන්තරයෙන් කටයුතු කරන්නට INSEE අප සූදානම්.” යනුවෙන් INSEE සිමෙන්ති සමාගමේ ප්‍රධාන මෙහෙයුම් නිලධාරී ඉංජිනේරු තුසිත් ගුණවර්ණසූරිය මහතා පැවසීය.
“INSEE සිමෙන්ති විසින් EcoLabel සහතිකය දිනාගැනීම මෙරට ඉදිකිරීම් ක්ෂේත්‍රයේ සන්ධිස්ථානයක්. ගෝලීය ප්‍රමිතීන්ට අනුකූලව තිරසර භාවිතයන් අනුගමනය කරමින් ශ්‍රී ලාංකික සමාගම්වලට ආදර්ශමත් නායකත්වයක් ලබා දීමක් මේ තුළින් පිළිබිඹු වෙනවා. මෙම සන්ධිස්ථානය ක්ෂේත්‍රයේ අනෙකුත් අයට ද එය අනුගමනය කිරීමට පෙළඹවීමක් ඇති කරන බව නොඅනුමානයි.” යනුවෙන් ශ්‍රී ලංකා NCPC මධ්‍යස්ථානයේ ප්‍රධාන විධායක නිලධාරී ඉංජිනේරු සමන්ත කුමාරසේන මහතා සඳහන් කළේය.
මෙම නව ප්‍රමිතියත් සමඟින්, INSEE සිමෙන්ති ශ්‍රී ලංකාවේ වඩාත් තිරසර ඉදිකිරීම් ක්ෂේත්‍රයක් උදෙසා අඛණ්ඩව සිදු කරන මෙහෙවරට නව පන්නරයක් සේ සැලකිය හැකි අතර, පාරිසරික කලමනාකරණය සහ කාර්මික සංවර්ධනය අත්වැල් බැඳගෙන ඇති බවට ද දිය හැකි මනා නිදසුනක් ද සපයයි.
