ශාකසාර සහ ස්ව-සත්කාර නිෂ්පාදන සඳහා ශ්‍රී ලංකාවේ ප්‍රමුඛතම සමාගමක් වන Link Natural Products (Pvt) Ltd සමාගම, මෙරට හෝටල් ක්ෂේත්‍රයේ දැවැන්තම වෙළෙඳ ප්‍රදර්ශනය වන Hotel Show Colombo 2024 ප්‍රදර්ශනයේදී, කැපී පෙණුනු පාරිභෝගික සහභාගිත්වයක් සහිතව නොමඳ අවධානයට පාත්‍ර වූ සන්නාමයක් බවට පත්විණි. එම ප්‍රදර්ශනය, කොළඹ BMICH හිදී මෙවර පැවැත්වුණේ 16 වැනි වරට වන අතර, එහිදී Link Natural හෝටල් සත්කාරක, Spa සහ HORECA (හෝටල්/ආපනශාලා/කැෆේ) නිෂ්පාදන පෙළ අතරට එහි ප්‍රමුඛ නිෂ්පාදන වන ලින්ක් සමහන්, ලින්ක් ඖෂධ, Earth Essence, ස්වස්ථ අමෘත, පස්පංගුව හා ගොටුකොළ තේ යන නිෂ්පාදන දහස් ගණනක් පාරිභෝගිකයන් හා ගැනුම්කරුවන්ගේ ඉහළම අවධානයට හා ප්‍රසාදයට පාත්‍ර විය.
ශ්‍රී ලංකාවේ හෝටල් ක්ෂේත්‍රයේ ප්‍රදර්ශනයකදී එලෙස ඉහළ පාරිභෝගික ප්‍රසාදයට පාත්‍ර වූ Link Natural Products (Pvt) Ltd, එම ක්ෂේත්‍රයේ ප්‍රමුඛතම සැපයුම්කරුවකු ලෙසින් දශකයකට වැඩි කාලයක් තිස්සේ, මෙරට නමක් දිනූ හෝටල් හා Spa ජාලවලින් වැඩි ප්‍රමාණයක් සඳහා ජාත්‍යන්තර මට්ටමේ සත්කාරක නිෂ්පාදන මෙන්ම HORECA නිෂ්පාදන සපයයි. Jetwing, Aitken Spence, Heritance, Taru Villas, Resplendent Ceylon, Barberyn Resort සහ Amaya Resorts වැනි ප්‍රධාන පෙළේ හෝටල් ජාල සහ ප්‍රමුඛ පෙළේ Spa 200 කට අධික සංඛ්‍යාවක් සඳහා දැනටමත් ප්‍රධාන සැපයුම්කරුවකු ලෙස කටයුතු කරයි. Link Natural නිෂ්පාදන කෙරෙහි ඇති විශ්වාසය, පිළිගැනීම හා ඒවායේ ඉහළ ගුණාත්මකභාවය හේතුවෙන්, එහි ශාකසාර ඖෂධීය නිෂ්පාදන පෙළ හා සගන්ධ තෙල් හෝටල් ක්ෂේත්‍රයේ මෙලෙස ඉහළම ප්‍රසාදය දිනාගන්නා ප්‍රධාන පෙළේ නිෂ්පාදන බවට පත්ව තිබේ.
මේ පිළිබඳව අදහස් දක්වමින් Link Natural හි අලෙවි අංශ ප්‍රධානී රාජ් කුමාර් මහතා මෙලෙස ප්‍රකාශ කළේය. “Colombo 2024 හෝටල් ප්‍රදර්ශනයට සහභාගී වීමෙන්, අපගේ Link Natural නිෂ්පාදන පෙළ හා ශ්‍රී ලංකාවේ හෝටල් ක්ෂේත්‍රය සමඟ පවත්නා ව්‍යාපාරික සම්බන්ධතා වැඩිදියුණු කරගැනීමට අපට හැකි වුණා. දැනටමත් හෝටල් ක්ෂේත්‍රයේ ප්‍රසිද්ධ සමාගම් භාවිත කරන අපගේ ශාකසාර නිෂ්පාදන පෙළ, ශ්‍රී ලංකාවේ බොහෝ Spa සහ හෝටල් සඳහා අත්‍යවශ්‍යම නිෂ්පාදන පෙළක්. එය, වසර ගණනාවක් තිස්සේම හෝටල් ක්ෂේත්‍ර වෙළෙඳ පොළ වෙත ගුණාත්මකබවෙන් යුත්, ඵලදායී නිෂ්පාදන ඒ ඒ අවශ්‍යතා සඳහාම ගැළපෙන පරිදි ලබාදීමට අපි දක්වන කැපවීමේ ප්‍රතිඵලයක්.”
ඉහළ පාරිභෝගික විශ්වාසය දිනාගනිමින් ශ්‍රී ලාංකයීය වෙළෙඳ පොළ දිනාගැනීම සඳහා Link Natural හි ඒ සඳහාම කැපවුණු කාර්ය මණ්ඩලයක් විසින් ඉටුකරනු ලබන සේවාවද අතිමහත්ය. ඉතා ඉහළ තත්ත්ව පාලනයක් යටතේ නිෂ්පාදනය සිදුකිරීම, බෙදාහැරීමේ ස්ථාවරත්වය පවත්වාගෙන යාම, මෙන්ම පාරිභෝගික ඉල්ලුමට ගැළපෙන පරිදි නම්‍යශීලී, වැඩිදියුණු කළ නිෂ්පාදන පිරිනැමීම, Link Natural නිෂ්පාදන මෙලෙස හෝටල් ක්ෂේත්‍ර වෙළෙඳ පොළ සාර්ථකත්වයට ඉවහල් වේ. පාරම්පරික ආයුර්වේදීය දැනුම, නූතන විද්‍යාව සහ නවීන තාක්‍ෂණය සමඟ මුසු කොට ගුණාත්මක නිෂ්පාදන රැසක් නිපදවා ඇති Link Natural, එම සියලු නිෂ්පාදන වෙළඳපොළට නිකුත් කරනුයේ අති නවීන පර්යේෂණ හා සංවර්ධන මධ්‍යස්ථානය තුළ සිදු කෙරෙන පර්යේෂණවලින් අනතුරුවය.
Link Natural Products (Pvt) Ltd, ශාකසාර ඖෂධීය නිෂ්පාදන හා ස්ව සත්කාරක සම්බන්ධ දිවයිනේ ප්‍රමුඛ පෙළේ සමාගමකි. 1982 වසරේ essential oils (සගන්ධ තෙල්) නිෂ්පාදනය මෙරට වෙළෙඳ පොළට මුල්වරට තිලිණ කරනු ලැබූ සමාගම, ඉකුත් වසර 40 පුරාවට ගුණාත්මකභාවයෙන් ඉතාමත් ඉහළ නිෂ්පාදන පාරිභෝගිකයන් වෙත ලබා දී ඇත. දේශීය විදේශීය පාරිභෝගිකයන්ගේ විශ්වාසය දිනාගත්, ලින්ක් සමහන්, ලින්ක් සුදන්ත, ස්වස්ථ-ත්‍රිපලා, Musclegard, කේෂා මෙන්ම පරම්පරා ගණනාවක විශ්වාසය දිනාගත් තවත් බොහෝ නිෂ්පාදන සමස්ත පාරිභෝගික සුව-සිද්ධිය තකා හඳුන්වා දෙනු ලැබිණි. සමාගම විසින් නිරන්තරයෙන් සිදු කරන ප්‍රබල පර්යේෂණ හා සංවර්ධන ක්‍රියාවලීන් එහි ව්‍යාපාර කටයුතු සඳහා ශක්තිමත් පදනම වී තිබේ. අද දවසේ පාරිභෝගිකයන්ගේ අවශ්‍යතා සපුරාලමින්, සෞඛ්‍ය සම්පන්න ජීවිතයක් සඳහා ඔවුන් යොමු කිරීමේ මාහැඟි අරමුණෙන්, Link Natural Products (Pvt) Ltd, පාරම්පරික ආයුර්වේද දැනුම, සුරක්ෂිත, කාර්යක්ෂම හා ගුණාත්මක ශාකසාර සත්කාරක නිෂ්පාදන සඳහා යොදාගනු ලබයි.
Hotel Show Colombo 2024 ප්‍රදර්ශනයට ලොව පුරා හෝටල් හා Spa නිෂ්පාදන සහ සේවා ඇතුළත් වෙළෙඳ කුටි 225 කට අධික සංඛ්‍යාවක් ඇතුළත් විණි. CDC Events සමඟ අත්වැල් බැඳගනිමින්, Sri Lanka Hospitality Graduate Association විසින් මෙම ප්‍රදර්ශනය සංවිධානය කර තිබිණි.
